Gema Adzan di Tatar Pakuan

Oleh: Abdurrahman Misno BP

“Allahu Akbar, Allahu Akbar” kadenge suara nu aneh tina kajauhan, Sabda Prana, micingkeun mata, awakna masih keneh karasa lunges, nangkarak di bale-bale tengaheun imah. Dina hatena kapikiran, “Esuk-esuk kiyeu saha nu tos gogorowokan kitu, kakarak ayeuna aya sora kitu, ti baheula Dayeuh teuh tenang mun isuk-isuk. Teu aya suara nanaon iwal simeut jeung jangkrik ti arah sisi Ciliwung, mun tos lingsir mah sora kotok ti handapeun imah ngahudangkeun jelma.

Sabda Prana hudang, langsung ka sisi Cisadane mawa lodong bari culak-cilek neangan iketna rek sarawu.

“Laa ilaha Illallah…” sora eta masih keneh kadenge, malah jelas pisan arah na di lebah kaler leuweng Samida arah ka Bantarjati.  

Tos ti cai, sabda prana langsung langsung nyokot kujang nu aya di selipan sasag, manehna emut poe iyeu aya pagawean di huma nu kudu diberesan. Usum haludu iyeu rada panjang jadi kudu rajin nagduruk jeung ngabersihan sesa-sesa tatangkalan nu tos dituar kamari.   

Panon poe kakarak ketempo konengna di palih wetan, ketempo endah pisan di sela-sela tatangkalan sisi Cisadane. Di lebah wetan rada ka kidul jelas pisan Sri Bima Punta Narayana Sura Dipati tegep nangtung di luhureun pasir. Arah ka kidul, gunung Buleud ajeg dikurilingan ku halimun.

Teu aya sasaha di imahna, nu aya di sisi kali Cisadane, ngan Sabda Prana sorangan. Akina teu acan lila maot di Kalapa perang ngalawan pasukan ti wetan. Ayeuna Sabda Prana hirup sabatang kara, sapopoe pagaweanana ka huma nu jarakna kurang leuwih 5 KM ka arah kidul sisi gunung Buleud.

Saatos mentas kali Cisadane, Sabda Prana nurutan jalan satapak ka arah kidul, isuk masih rada poek ngan kusabab tos biasa, manehna jalan lempeung ngaliwatan pahumaan. Sababaraha kali manehna kapendak jeung urang dayeuh nu sarua rek arangkat ka huma.

Sanajan awak bari jalan ka huma, ngan pikiran teh masih keneh kaemutan sora nu isuk-isuk tadi kedenge ti arah belah kaler “Asa-asa teu jauh ti arah leuweng Samida, ka belah kaler”. Bari ngalamun mikiran eta sora, Sabda Prana neupi ka hujung lembur Nyalindung.

“Sampurasun, Jang Sabda, eh kunaon ngalamun kitu” ujug-ujug aya aki-aki di hareupen manehna.

“Ra….ra… rampes Ki” bari sasalaman jeung sungkem ka si Aki nu make acuk bodas jeung iket bodas mawa ietuk kai Kaboa.

“Nembe ti mana ki, isuk-isuk tos ti gunung” Sabda nanya ka aki-aki tadi.  

“Maneh teuh tos poho, pan biasa Kami mah ti karamat Gunung Buleud” ceuk aki tadi bari ngajakan Sabda Prana diuk di handapeun tangkal campaka di sisi jalan.

“Aki rek ngomong ka maneh Sabda” si Aki ngaluarkuen tangkal kawung nu biasa dihiseup.

“Kiyeu, jaman teh ayeuna tos mulai robah, maneh kudu sadar jeung ngarti” ceuk si Aki

“Meksadna naon Ki” baru ngageser diukna ngadeketan si Aki

“Maneh mah teu ngarti wae, mentak hirup teh tong di huma wae” suara si Aki rada tinggi bari ngalepus daun kawung.

“Esuk pageto Dayeuh Pakuan bakal robah, duka Aki ngalaman atanapi heunte ngan maneh mah bakal ngalaman, aya ageman anyar ti kulon anu ngajakan urang nyembah ka Sang Hyang Tunggal. Ngan maranehna nyebatna Allah”

Sabda Prana mikir dina jero hati “Allah…?, eta sarua jeung sora anu gogorowakan isuk tadi”.

“Sakalian Aki, kami ge rek nanya, ari sora nu ayeuna kadenge ti belah kaler eta sora naon?” panasaran pisan asa-asa Sabda Prana ngadagoan jawaban ti si Aki.

“Aki ge teu nyaho, ngan ceuk Rakeyan Jaya Antea nu tos asup kana eta ageman, eta tanda ekeur urang Islam tos asup waktu sembah Hyang”.

“Kitu nya Ki”  Sabda Prana pursa-pura ngarti kana eta omongan si Aki.

“Punten Aki, panon poe tos moncorong, kami rek ka huma engke nyambung deui mun kami balik ka Dayeuh.

“Sok lah Sabda Prana, ngan ku maneh emutan. Lamun eta agama tos sumembar di Tatar Sunda bakalan jadi jalan ekeur urang Sunda ngahontal kabagjaan anu saleresna” laju kaduana sasalaman, si Aki leumpang ka arah Dayeuh, samentara Sabda Prana ka arah huma sisi gunung Buleud.

Bari leumpang Sabda Prana mikiran deui sora nu esuk-esuk tadi jeung wasiat si Aki tadi. Kapikiran kumaha engke 100 taun atawa 1000 tahun deui Dayeuh Pakuan, ayeuna wae masyarakatna tos leuwih 50.000, kumaha 100 tahun deui. Teu kapikiran pisan ku Sabda Prana, kalanjutan carita dayeuh iyeu, nu kapikiran mah pesen ti Akina baheula “Maneh ulah pipiluen pulitik, cukup aki wae nu jadi prajurit. Maneh mah ayeuna gawe wae di huma, ulah kabawa-bawa pitnah nu aya di Tatar Sunda iyeu, komo kabawa kapentingan kakuasaan nu lobana ngabawa-bawa ageman.” Eta pesen ti Akina wektos uih ti Tarum sateacan ka Kalapa.

Dina umur 25 taun Sabda Prana rajin pisan ngahuma, lega humana ti sisi gunung Buleud lebah kaler neupi ka arah Cipinang Gading. Memang manehna teu mikiran naon kajadian nu aya di Kalapa, di Sumedang atanapi di Caruban. “Nu aya mah ngan pasea keur kapentingan pulitik kekuasaan. Laju, agama dibawa-bawa, padahal mah agama pan ngajaran kahadean ka jelma. Lamun aya agama nu ngaruksak ejeung musuhan batur eta mah lain agamana ngan jelmana hungkul” eta pesen Akina nu kaeinget jeung jadi cecekelan hirup. Sabda Prana yakin pisan, mun urang haying hirup bagja, kudu hade ka batur sanajan beda agama ge pan eta ge makhluk Sang Hyang. ambp